ජුදා ගැන සමිඳාණන් වහන්සේගේ පැමිණිල්ල
1 ජුදාහි රජවරුන් වූ උශ්ශියාගේ ද ජෝතාම්ගේ ද ආහාස්ගේ ද හෙසකියාගේ ද කාලයන්හි දී ජුදා දේශය හා ජෙරුසලම පිළිබඳ ව ආමොස්ගේ පුත් යෙසායාට දෙවියන් වහන්සේ එළිදරව් කළ පණිවුඩ මේ පොතේ සටහන් කර ඇත.
2 සමිඳාණන් වහන්සේ මෙසේ වදාරන සේක:
”සමිඳුන් වන මා කියන දේට අහස සවන් දෙන්න;
පොළොව කන් දෙන්න.
මා විසින් හදාවඩා, ඇතිදැඩි කරගන්නා ලද දරුවෝ ම මට විරුද්ධ ව කැරලි ගැසූ හ.
3 ගවයාට උගේ අයිතිකාරයා ගැන දැනුමක් ඇත;
කොටළුවාට උගේ ස්වාමියාගේ පට්ටිය ගැන තේරුමක් ඇත.
එහෙත්, මාගේ ඉශ්රායෙල් සෙනඟට එවැනි දැනුමක් නැත.
මාගේ සෙනඟට තේරුම්ගැන්මක් කොහෙත්ම නැත.”
4 අනේ!
පාපිෂ්ඨ ජාතියක් ද අපරාධයෙන් බර සෙනඟක් ද නපුර කරන වංශයක් ද දුෂ්ට ලෙස ක්‍රියාකරන දරුවන් ද වන ඔවුන් සමිඳුන් අත්හැර,
ඉශ්රායෙල්හි ශුද්ධ තැනැන් වහන්සේ හෙළා දැක, එතුමන්ට පිටුපා ඇත.
5 ඔබ වඩ වඩා කැරලි ගසන්නේ වැඩි වැඩියෙන් දඬුවම් ලබන පිණිස ද?
ඉශ්රායෙල් ජාතිය, ඔබේ හිස වණ වී ඇත.
ඔබේ සිත මුළුමනින් ම දුර්වල ය.
6 හිස් මුදුන සිට යටි පතුල දක්වා කිසිම නිරෝගී තැනක් ඔබට නැත.
තුවාළවලින් ද තැළීම්වලින් ද පැසවන වණවලින් ද ඔබේ සිරුර පිරී ඇත.
ඔබේ තුවාළ සෝදා බැඳ නැත;
ඒවාට බෙහෙත් තෙල් දමා නැත.
7 ඔබේ දේශය පාළු වී ඇත;
නගර ගිනිබත් වී ඇත.
ඔබ බලා සිටිය දී විදේශිකයෝ ඔබේ දේශය නැතිනාස්ති කරති.
එය සොදොම් මෙන් පාළු වී ඇත.
8 ජෙරුසලම වනාහි මිදි වත්තක මඩුවක් මෙන් ද කැකිරි වත්තක පැල්පතක් මෙන් ද ආරක්ෂා රහිත වූ වටලනු ලැබූ නගරයක් මෙන් ද යන්තමින් ඉතිරි වී ඇත.
9 සව් බලැති සමිඳාණෝ මෙසේ ටික දෙනෙකුට ඉතිරි වන්න ඉඩ නුදුන් සේක් නම්,
ජෙරුසලම ද සොදොම් හා ගොමොරා මෙන් සහමුලින් ම විනාශ වන්න ඉඩ තිබිණි.
වැදගැම්මක් නැති පුද පූජා
10 එම්බා ජෙරුසලම!
ඔබේ ප්‍රධානීහු ද සෙනඟ ද සොදොමේ හා ගොමොරාවේ සිටි අය වැනි ය.
සමිඳුන් වදාරන දේට සවන් දෙන්න.
දෙවිඳුන් උගන්වන දේ සිතට ගන්න.
11 එතුමාණෝ මෙසේ වදාරන සේක:
”නුඹලාගේ නිමක් නැති පූජාවලින් මට වැඩක් ඇද් ද?
බැටළුවන් දවන පූජා ද තර සතුන්ගේ තෙල් ද මට තිත්ත වී ඇත.
එළු, බැටළු, ගව ලේ මට රුස්සන්නේ නැත.
12 නුඹලා මා නමදින්න පැමිණෙන විට මේවා ගෙනෙන්න කීවේ කවරෙක් ද?
එසේ මාගේ මළුවෙහි පා තබන්න නුඹලාට කීවේ කවරෙක් ද?
13 ඔය නිෂ්ඵල පූජා තවත් නොගෙනෙන්න;
දුම් පූජා මට ඉවසිය නොහැකි ය.
අමාවක් උත්සව ද සබත් දවස් ද ආගමික රැස්වීම් ද මට රිසි නැත.
නුඹලාගේ පාපවලින් ඒවා දූෂණය වී ඇත.
14 නුඹලාගේ අමාවක් උත්සව හා වන්දනා ගමන් මාගේ හද පත්ලෙන් මම හෙළා දකිමි.
තවත් උසුලන්න බැරි තරමට ඒවා මට මහා බරකි.
15 මට අයැදින පිණිස නුඹලා අත් ඔසවන කල එය නොදකින ලෙස මම මාගේ ඇස් වසාගන්නෙමි.
නොකඩවා යාච්ඤා කළත් කිසිසේත් සවන් නොදෙන්නෙමි.
නුඹලාගේ අත් ලෙයින් පිරී ඇත.
16 ස්නානය කොට පිරිසිදු වන්න;
මා ඇස් හමුයෙන් ඔය පව් දුරු කරන්න.
නපුරුකම් තවත් නොකරන්න.
17 යහපත කරන්න ඉගෙන ගන්න;
පීඩා විඳින්නන්ට පිහිට වන්න;
අනාථයන්ගේ හිමිකම් රැක දෙන්න;
වැන්දඹුවන් උදෙසා ඉදිරිපත් වන්න.
මෙසේ යුක්තිය ඉටු කරන්න.
18 ‘එන්න, අපි මේ ගැන සාකච්ඡා කරමු’යි සමිඳාණෝ වදාරන සේක.
”නුඹලාගේ පව් රතට රතේ තිබෙන නමුත්, ඒවා හිම මෙන් සුදු වන්නේ ය;
තද රතු පැහැයෙන් තිබෙන නමුත්, සුදු ලොම් මෙන් වන්නේ ය.
19 නුඹලා සිය කැමැත්තෙන් කීකරු වන්නහු නම්, දේශයේ සාරවත්කම භුක්ති විඳින්නහු ය.
20 අකීකරු වී කැරලි ගසන්නහු නම් කඩුවෙන් මැරුම් කන්නහු ය.”
සමිඳාණෝ සිය සිරි මුවෙන් මෙය වදාළ සේක.
දූෂිත නුවර පිළිබඳ තීන්දුව
21 අහෝ, විශ්වාසවන්ත ව සිටි නුවර දැන් වෙසඟනක වී සිටින හැටි!
එදා එහි සිටියෝ යුක්තිය ඉටුකළ දැහැමියෝ ය;
අද සිටින්නෝ මිනීමරුවෝ ය.
22 එම්බා ජෙරුසලම!
එක් කලක ඔබ රිදී මෙන් වූ නමුත්,
දැන් ඔබේ වටිනාකමක් නැත.
එක කලක ඔබ හොඳ මිදියුස මෙන් වූ නමුත්,
දැන් වතුර සමඟ මිශ්‍ර වී ඇත.
23 ඔබේ මූලිකයෝ කැරලිකාරයෝ ය,
සොරුන්ගේ මිතුරෝ ය.
සියලු දෙන ම අල්ලසට ඇලුම් කරති.
තම වාසිය සොයා යති;
අනාථයන්ට යුක්තිය ඉටුකර නොදෙති;
වැන්දඹුවන්ගේ නඩුවලට සවන් නොදෙති.
24 එබැවින්, ඉශ්රායෙල්වරුන්ගේ සව් බලැති සමිඳාණන් වදාරන මේ දේට සවන් දෙන්න;
”මම මාගේ එදිරිකාරයන් අබිබවා මාගේ සතුරන්ගෙන් පළිගන්නෙමි;
25 මම නුඹලාට විරුද්ධ ව ක්‍රියාකර, ගිනි උදුනෙහි ලෝහ පිරිසිදු කරන්නාක් මෙන් නුඹලා පිරිසිදු කරන්නෙමි;
නුඹලාගේ සියලු බොර රොඩු ආදිය ඉවත් කරන්නෙමි;
26 පෙර සිටියාක් මෙන් විනිශ්චයකාරයන් ද අනුශාසකයන් ද මම නුඹලාට නැවත දෙන්නෙමි.
එවිට, ‘ජෙරුසලම ධර්මිෂ්ඨ නුවර ය, විශ්වාසවන්ත නුවර ය’යි කියනු ලැබේ.”
27 සමිඳුන් දමිටු වන බැවින් එතුමාණෝ ජෙරුසලම ද එහි සිටින එතුමන් වෙත හැරෙන සියල්ලන් ද ගළවන සේක.
28 එහෙත්, ද්‍රෝහිකම් කරන්නෝ ද පව්කාරයෝ ද එකට විනාශ කරනු ලබන්නෝ ය;
සමිඳුන් අත්හරින්නෝ ද විනාශ වෙති.
29 නුඹලා කලින් රුක් වන්දනාවේ යෙදුණු බැවින් ද ශුද්ධ වූ උද්‍යාන පිහිටෙවූ බැවින් ද ඒවා ගැන ලජ්ජා වන්නහු ය.
30 නුඹලා කොළ මැලවී යන ආලෝන ගසක් මෙන් ද වතුර නැති උයනක් මෙන් ද වන්නහු ය.
31 ගින්නෙන් පිදුරු දැවී යන්නාක් මෙන් බලවත් අය තමන්ගේ ම පවිටු ක්‍රියාවලින් විනාශවන්නෝ ය.
එය නැවැත්වීම කිසිවෙකුට වත් නොහැකි වේ.
